Óreiðan hjá Stjörnuskoðunarfélagi Seltjarnarness

Á síðasta ári komu upp grunsemdir um að ekki væri allt með felldu í fjármálum Stjörnuskoðunarfélags Seltjarnarness. Af þessum sökum tókst ekki að ljúka aðalfundi félagsins, sem efnt var til hinn 26. janúar 2017, og var framhaldsaðalfundur haldinn 20. mars. Fundargerðin sem birt var eftir þann fund gaf ekki rétta mynd af því sem á fundinum gerðist. Af lestri hennar mátti ætla að ekkert hefði komið fram sem væri óeðlilegt varðandi reikninga félagsins. Þess var hvergi getið að undirritaður las upp og afhenti til bókunar greinargerð þá sem hér fylgir. Fram kemur að reikningar ársins 2015 hafi verið samþykktir með 12 atkvæðum en þrír hafi verið á móti. Vert er að benda á, að þessir þrír voru þeir menn sem unnið höfðu að því mánuðum saman að grandskoða reikningana. Hinn 13. maí var nýkjörnum formanni félagsins send athugasemd með tilmælum um að fundargerðin yrði leiðrétt. Því var vel tekið, og standa vonir til að úrbætur fáist.

Þorsteinn Sæmundsson

 
Sett á vefsíðu 17.6. 2017