Á Vísindavef Háskóla Íslands segir svo í  svari við því hvers vegna sumardagurinn fyrsti sé haldinn hátíðlegur:

   "Í stærstu dráttum var árinu skipt í tvö nær jafnlöng misseri: Vetur og sumar. Vetrarmisserið byrjaði alltaf á laugardegi og sumarmisserið á fimmtudegi."

   Þetta er ekki alls kostar rétt. Eins og segir í Almanaksskýringum tíðkaðist um alllangt skeið að telja veturinn hefjast á föstudegi. Þegar skipt var um tímatal á Íslandi árið 1700 var þetta beinlínis lögfest.

   Í frjálsa alfræðiritinu Wikipediu segir um gormánuð að fyrsta dag þess mánaðar (fyrsta vetrardag) beri upp á laugardag 21.-27. október. Þetta er ekki rétt. Í undantekningartilvikum (í svokölluðum rímspillisárum) ber vetrarkomu upp á 28. október, og er það síðasta mögulega dagsetningin. Sams konar villa er í köflunum um  þorra og góu Þar eru seinustu dagsetningar sagðar vera 25. janúar og 24. febrúar. Munar þar aftur einum degi því að bóndadagur getur fallið á 26. janúar og konudagur á 25. febrúar ef árið á undan er rímspillisár. Rímspillirinn veldur því að mögulegar dagsetningar verða átta en ekki sjö. Athygli vekur að í kaflanum um gormánuð er rétt farið með dagsetningarnar í gamla stíl (júlíanska tímatalinu) og eru dagarnir þar taldir átta eins og vera ber. Í kaflanum um þorra eru dagsetningarnar hins vegar of  fáar, bæði í gamla stíl og nýja stíl. 

   Í köflunum um gormánuð, þorra og góu er vitnað í bókina Sögu daganna sem heimildar, en í  svarinu á Vísindavefnum  er vitnað til höfundar sömu bókar. Að líkindum stafa villurnar af fljótfærni,  því að höfundurinn hafði almanaksskýringarnar undir höndum þegar hann ritaði sína bók, og sjást þess reyndar nokkur merki.

  
Þ. S. 6. maí 2013