Grænubaunamálið

Á undanförnum árum hefur ýmislegt verið ritað um svokallað "grænubaunamál". Í þessum skrifum hefur víða gætt misskilnings, og þegar verst lætur hafa menn gerst sekir um beinar rangfærslur. Rangfærslurnar eru aðallega tvenns konar. Í fyrsta lagi er því haldið fram að málið hafi verið pólitísks eðlis og til þess ætlað að hafa áhrif á kosningar sem framundan voru. Í öðru lagi er reynt að gera sem minnst úr málinu, umræðan einskorðuð við það sem fólki varð minnisstætt, þ.e. grænu baunirnar, þótt sá þáttur væri smávægilegur í samanburði við önnur málsatvik. Hingað til hef ég ekki séð ástæðu til að leiðrétta þessi skrif, enda ærið starf og óvíst um árangurinn. Nýlega rakst ég þó á grein sem vakti mig til umhugsunar um það hvort tími væri kominn til einhvers konar aðgerðar. Greinin birtist í frjálsa alfræðiritinu Wikipedia undir fyrirsögninni "Stjórnmálahneyksli á Íslandi" og hljóðar svo:

"Grænubaunamálið - Steingrímur Hermannsson sem þá var framkvæmdastjóri Rannsóknaráðs keypti grænar baunir og annan mat fyrir Surtseyjarfélagið sem hann var formaður í. Reikningur vegna kaupanna fannst svo í bókhaldi Rannsóknaráðs, en þar voru grænu baunirnar skráðar sem viðhald á bifreið Rannsóknarráðs."
Lengra nær skýringin ekki.

Þessi lýsing á málsatvikum er gott dæmi um það hvernig frásögn getur verið rétt svo langt sem hún nær, en samt verið algjörlega villandi. Ef einhver skyldi hafa áhuga á að vita hvað málið snerist raunverulega um, er honum bent á að lesa þær greinar sem ég ritaði í Morgunblaðið í maí og júní  1971. Greinarnar voru þrjár, og er hægt að fletta þeim upp hér fyrir neðan:

Ævintýri í Rannsóknaráði. Morgunblaðið 18. maí 1971.
Jólagjöf til Jankovic. Framhaldssaga úr Rannsóknaráði. Morgunblaðið 8. júní 1971.
Nokkur orð til Samvinnutrygginga. Morgunblaðið 12. júní 1971.

Hafa verður í huga þegar svo langt er um liðið að allar tölur eru úr takti við verðlag nú á tímum.

Þess má geta að svar barst aldrei við síðustu greininni.
 

                                                              Þorsteinn Sæmundsson

14. 1. 2008