Þetta var séra Sigurbjörn Einarsson, síðar biskup. Vorið1975, þegar málaferlin voru mjög til umræðu í dagblöðum, átti ég viðtal við biskup á skrifstofu hans. Erindi mitt var að fá álit hans á vali og orðalagi messutexta sem ég hugðist taka upp í Almanak Háskólans eftir nokkurra ára hlé. Málaferlin voru alls ekki til umræðu, og það hefði ekki hvarflað að mér að minnast á þau. En þegar við kvöddumst sá biskup ástæðu til að viðhafa þau ummæli sem hér var getið. Að sjálfsögðu þótti mér vænt um að heyra að hann hefði skipt um skoðun í varnarmálunum, en við ræddum þau mál ekki frekar.
Nokkru síðar varð ég viðstaddur réttarhald í einu meiðyrðamálanna. Ingi R. Helgason lögfræðingur, verjandi stefndu, vitnaði þá í ummæli sem séra Sigurbjörn hefði viðhaft þegar innganga Íslands í Atlantshafsbandalagið var á dagskrá. Þegar hlé varð í réttarhaldinu gaf ég mig á tal við Inga R. og sagði honum að séra Sigurbjörn hefði skipt um skoðun í þessu máli og benti honum á að hafa samband við biskup til að fá staðfestingu á þessu. Ingi R. lét sér fátt um finnast, og þegar framhald varð á dagskránni hélt hann uppteknum hætti og vitnaði aftur í sömu ummæli séra Sigurbjörns.