Afmæli Varins lands

    Tíu ára afmælis Varins lands var minnst í Morgunblaðinu 21. mars 1984 með ýtarlegri frásögn og forystugrein. Efni þetta er aðgengilegt á vefnum undir www.timarit.is. Sagt er frá því að kistillinn með undirskriftunum hafi verið sóttur á lögreglustöðina í Reykjavík og færður í Alþingishúsið þar sem innsigli var rofið og bækurnar sýndar og ljósmyndaðar. Þarna kemur ýmislegt fram sem ekki er skráð annars staðar, svo sem um breytt viðhorf Ólafs Jóhannessonar fyrrum forsætisráðherra. Þá er getið góðra manna sem lögðu fram vinnu sína fyrir undirskriftasöfnunina endurgjaldslaust. Þeirra á meðal voru Garðar Sigurðsson hjá Borgarprenti, sem annaðist prentun undirskriftalistanna, og þeir Magnús Brynjólfsson og Magnús Ó. Magnússon sem sáu um bókband og frágang fyrir afhendingu listanna. Morgunblaðsgreininni fylgdi eftirfarandi mynd sem tekin var á heimili Þórs Vilhjálmssonar í febrúar 1984.

Á myndinni sjást, talið frá vinstri:
Efri röð: Jónatan Þórmundsson, Óttar Yngvason, Unnar Stefánsson, Valdimar Magnússon, Ragnar Ingimarsson, Hörður Einarsson, Bjarni Helgason og Björn Stefánsson.
Neðri röð: Stefán Skarphéðinsson, Þorvaldur Búason, Þorsteinn Sæmundsson og Þór Vilhjálmsson. Á myndina vantar tvo af forgöngumönnum Varins lands, þá Hreggvið Jónsson og Ólaf Ingólfsson.